பன்மொழி ரீமேக்கில் சாதித்த தமிழ்த் திரைப்படங்கள்!

  பால கணேசன்   | Last Modified : 30 Jun, 2018 10:18 am

best-tamil-movies-remade-in-two-or-more-languages

ஒரு மொழியில் பெரும் வெற்றி பெரும் படைப்பு ஒன்றை இன்னொரு மொழியில் மீண்டும் எடுப்பது என்பது காலம்காலமாக உலகம் முழுக்க நடக்கும் விஷயம். ஏற்கெனவே நாம் இதில் தமிழில் இருந்து தெலுங்கிற்கும், தெலுங்கில் இருந்து தமிழிற்கும் அப்படி மொழிமாற்றம் செய்யப்பட படங்களை பார்த்திருக்கிறோம். இன்று நாம் பார்க்கப்போவது, ஒரு மொழியில் எடுக்கப்பட்டு பின்னர் தமிழிலோ, தெலுங்கிலோ அல்லது இந்தியிலோ மற்றும் வேறு மொழிகளிலோ மீண்டும் எடுக்கப்பட்ட படங்களைப் பற்றி. இதில் பல படங்கள் தோல்வியடைந்து உள்ளன. பல படங்கள் ஒரிஜினலை விட மிகப் பெரிய வெற்றியை பெற்றுள்ளன. இதற்கு பின் இருக்கும் உளவியல் பற்றியும் சற்று நோட்டமிடலாம்.

அந்த ஏழு நாட்கள்

பாக்யராஜின் படங்கள் மிகப் பெரிய வெற்றியை பெற்றுக்கொண்டிருந்த காலகட்டத்தில் வெளிவந்த படமே 'அந்த ஏழு நாட்கள்'. பாக்யராஜின் எல்லா குறும்புத்தனமும் கலந்த திரைக்கதையும், இறுதியில் அவர் வைத்திருந்த தாலி செண்டிமெண்ட் காட்சியும் பெண்களை கூட்டம் கூட்டமாக திரையரங்கை நோக்கி படையெடுக்க வைத்தது. வழக்கம்போல் படம் மிகப் பெரிய வெற்றியை பெற, தெலுங்கில் பாபு என்பவர் இயக்க, சந்திரமோஹன், ராதிகா, சரத்பாபு நடிப்பில் வெளியானது. தமிழை விட தெலுங்கில் இன்னும் மிகப்பெரிய வெற்றியை இந்தப் படம் பெற்றது. அதைவிட முக்கியமாக தெலுங்கில் வெளிவந்த மிக முக்கிய திரைப்படங்களில் ஒன்று என்றும் விமர்சகர்களால் பாராட்டப்படவும் செய்தது. 

தெலுங்கில் அடைந்த வெற்றியை கருத்தில் கொண்டு போனி கபூர் இதை தெலுங்கில் எடுத்த அதே இயக்குநரை வைத்து இந்தியில் எடுக்க விரும்பினார். கதாநாயகனாக அனில் கபூர் நடித்த முதல் படம் இதுதான். தமிழில் அம்பிகா நடித்த பாத்திரத்தில் பத்மினி கோலாபுரி நடித்தார். தமிழ், தெலுங்கு அளவுக்கு இல்லாவிட்டாலும் படம் வெற்றிக்கனியை ருசித்தது. இந்தப் படம் நீண்ட காலம் நம் இந்திய சினிமாக்களில் கொஞ்சம் மறைத்து வைக்கப்பட்டிருந்த தாலி செண்டிமெண்ட் விஷயத்தை மீண்டும் தோண்டி எடுத்து கொண்டுவந்தது. இதேபோன்ற தாலி செண்டிமெண்ட் படங்கள் பின்னர் வரிசைகட்டி வந்ததே அதற்கு சாட்சி. ஆனால் திரைக்கதை வடிவமைப்பில் இந்தப் படம் ஒரு புது அத்தியாயம் எழுதியது என்றே கூறலாம். 

இந்தப் படத்தின் மீது ஈர்ப்பு கொண்ட சஞ்சய் லீலா பன்சாலி 1999-ல் இதே கதையை மையமாக வைத்து 'ஹம் தில் தே ச்சுக்கே சனம்' என்று மீண்டும் எடுத்தார். உலக அழகி ஆனபின்னர் ஐஸ்வர்யா ராய் நிறைய படங்கள் நடித்திருந்தாலும் அவரது முதல் ஹிட் படம் இதுதான். ஒருவகையில் பார்த்தால் இந்தப் படத்தை நடிகர் சந்திரபாபுவின் வாழ்க்கையில் நடந்த சம்பவங்களின் பாதிப்பு என்றும் சொல்வார்கள். தமிழில் ராஜேஷ் செய்த கதாபாத்திரத்தை தெலுங்கில் சரத்பாபுவும், இந்தியில் நஸ்ருதீன் ஷாவும் செய்தனர். இதில் நஸ்ருதீன் ஷாவின் நடிப்பு அதி அற்புதமாக இருக்கும். கன்னடத்திலும் கூட "லவ் மாடி நோடு" என்கிற பெயரில் ரீமேக் செய்யப்பட்டது.

நா ட்டாமை

கே.எஸ்.ரவிக்குமார் சூப்பர் குட் பிலிம்ஸ் நிறுவனத்தின் செல்லப் பிள்ளையாக இருந்த காலகட்டத்தில் இயக்கிய 'சேரன் பாண்டியன்' படம் நல்ல வரவேற்பை பெற்றது. பின்னர் இரண்டு மூன்று சுமார் படங்கள் கொடுத்தாலும் மினிமம் கேரண்டி இயக்குனர் என்கிற பெயர் இவருக்கு இருந்தது. 1994-ல் மீண்டும் சூப்பர் குட் நிறுவனத்திற்கு அவர் இயக்கிய படமே 'நாட்டாமை'. நன்றாக கவனித்தால் அந்த காலகட்டங்களில் பொள்ளாச்சி கவுண்டர் இன மக்களை அடிப்படையாக வைத்து நிறைய கிராமத்து கதைகள் எடுக்கப்பட்டன. அதே பாணியை பின்பற்றித்தான் 'நாட்டாமை'யும் எடுக்கப்பட்டது. ஏற்கனவே பழக்கப்பட்ட கதையாக இருந்தாலும், கே.எஸ்.ரவிக்குமாரின் திரைக்கதை காரணமாக படம் பட்டிதொட்டியெங்கும் பட்டையை கிளப்பியது. 1994-ல் வெளிவந்த படங்களில் மிக அதிக வசூல் செய்து சாதனை புரிந்தது. 

'நாட்டாமை' படத்தின் பிற மொழி உரிமைகளுக்காக குறிப்பாக தெலுங்கு உரிமைக்காக பெரும்போட்டி நிலவியது. இறுதியில் ரஜினியின் நண்பர் மோகன் பாபு தெலுங்கு உரிமையை தட்டிச் சென்றார். இந்தப் படம் ரஜினிக்கு தனிப்பட்ட முறையில் மிகவும் பிடித்த படம். கே.எஸ்.ரவிக்குமாரின் திறமையை ரஜினி கண்டுகொண்டது இந்தப் படத்தில்தான். இதன் காரணமாக தமிழில் விஜயகுமார் செய்த கதாபாத்திரத்தை தெலுங்கில் ரஜினியே செய்தார். 'பெத்தராயுடு' என்ற பெயரில் வெளியான இந்தப் படம் மிகப்பெரிய வெற்றியை பெற்றது. 

ஆரம்பத்தில் தமிழில் மூத்த சரத்குமார் வேடத்தில் விஜயகுமார்-தான் நடிப்பதாக இருந்தது. இறுதி நேரத்தில்தான் கே.எஸ்.ரவிக்குமார் அண்ணன், தம்பி ஆகிய இரண்டு வேடத்திலும் சரத்குமாரையே நடிக்க வைக்க முடிவு செய்தார். இது மிகவும் நன்றாக வேலை செய்தது. அடுத்து இந்தியில் அணில் கபூர் அவர்கள் கதாநாயகனாக நடிக்க, மீண்டும் ரஜினியே இந்தியிலும் விஜயகுமாரின் பாத்திரத்தை செய்தார். ஆனால் எதிர்பார்த்த வெற்றியை படம் பெறவில்லை. இந்தப் படத்தின் சேட்டிலைட் உரிமை சன் டிவிக்கு விற்கப்பட்டாலும் கூட யாரும் எதிர்பாராவண்ணம் படம் வெளிவந்த சில நாட்களிலேயே ஜெஜெ டிவியில் ஒளிபரப்பானது.

எப்படி என்றால் அந்த நேரத்தில் ஜெயலலிதா உடன் சரத் நல்ல நட்புறவில் இருந்தார். ஜெயலலிதா விரும்பிக் கேட்டதால் படத்தின் ஒரு காப்பியை சரத்குமார் தனிப்பட்ட முறையில் கொடுக்க, அதை ஜெஜெ டிவிக்காக ஜெயலலிதா உபயோகித்துக்கொண்டார் என்று சொல்வார்கள். ஆனால் இதில் மாற்றுக்கருத்து உள்ளவர்களும் உண்டு. பின்னர் இந்தப் படம் கன்னடத்தில் சிம்மாதிரிய சிம்மா" என்கிற பெயரில் விஷ்ணுவர்தன் நடிப்பில் வெளிவந்தது.

சேது 

பாலுமகேந்திராவிடம் உதவி இயக்குநராக இருந்த பாலா முதலில் இயக்குவதாக இருந்த படம் கைவிடப்பட்டது. பின்னர் பல தடைகளுக்கு பிறகு 'சேது' படத்தை இயக்குவதற்கான வாய்ப்பு அவருக்கு கிட்டியது. தனது நண்பனின் வாழ்வில் நடந்த ஒரு சம்பவத்தை அடிப்படையாக வைத்து திரைக்கதை எழுதியிருந்தார் பாலா. படம் படப்பிடிப்பு முடிந்து வெளியீடுக்கு சிறப்புக் காட்சிகள் பலருக்கும் திரையிட்டு காண்பிக்கப்பட்டது. படம் திருப்தியை கொடுத்தாலும் இறுதிக் காட்சி யாருக்குமே பிடிக்கவில்லை. இப்படி நெகட்டிவ் காட்சிகள் வைத்தால் அது ஓடாது என்கிற மனோபாவம் எல்லாருக்கும் இருந்தது. படம் போணியாகவில்லை. 

பின்னர் சிறிதுநாள் கழித்து மீண்டும் திரையிட்டார்கள். ஒன்றும் நடக்கவில்லை. சொன்னால் நம்பமாட்டீர்கள்.. இப்படி விநியோகஸ்தர்களுக்கு சிறப்பு காட்சிகள் மட்டும் நூறு முறைக்கு மேல போட்டுக் காட்டப்பட்டது படம். பாலா கூட ஒரு நேர்காணலில், " ப்ரிவியூ தியேட்டர்ல மட்டும் நூறு நாளுக்கு மேல ஓடுன ஒரே படம் இதுவாத்தான் இருக்கும்.." என்று சிரித்துக்கொண்டே சொன்னார். ஒருவழியாக படம் வெளியானது. படத்தின் விளம்பர செலவுக்கு கூட தயாரிப்பாளர் பணம் செலவு செய்யவில்லை. நடிகர் விக்ரம் தனது மனைவியின் நகைகளை அடமானம் வைத்து புரட்டிய 40,000 ரூபாயை வைத்து போஸ்டர் அடித்து ஒட்டினார்கள். ஒரே வாரத்தில் ஊரெங்கும் சேது படம் பற்றிய பேச்சாகத்தான் இருந்தது. எல்லா பத்திரிக்கைகளும் படத்தை பாராட்ட, படம் தமிழகமெங்கும் பல்வேறு திரையரங்குகளில் திரையிடப்பட்டது. நான்கு திரையரங்குகளில் நூறு நாட்களை கடந்தும் ஓடியது. 

பின்னர் இந்தப் படத்தை பார்த்த பிரபல தெலுங்கு நடிகர் ராஜசேகர் தெலுங்கு ரீமேக் உரிமையை வாங்கினார். படத்தை அவரது மனைவி ஜீவிதாவே இயக்கினார். ராஜசேகரின் வயது அதிகம் என்பதால் சீயானின் பின்கதை அதற்கேற்றவாறு சற்று மாற்றப்பட்டது. அந்நேரத்தில்தான் சல்மான்கானும், ஐஸ்வர்யா ராயும் பிரிந்தனர். மீடியா முழுக்க இந்தப் பேச்சு பரபரப்பாக அடிபட்டுக் கொண்டிருந்த காலம் அது. எல்லோரும் சல்மான்தான் இந்த உறவு முறிவுக்கு காரணம் என்று கைகாட்டிக் கொண்டிருந்த சூழலில் "தேரே நாம்" படத்தின் அறிவிப்பு வெளிவந்தது.

படத்தை பற்றி இயக்குநர் கூறுகையில், "இது ஒரு ரீமேக் படமாக இருந்தாலும் கூட, இந்த சல்மான் - ஐஸ்வர்யா பிரச்னையில் சல்மான் பக்கமிருக்கும் நியாயத்தை யாருமே பார்க்கவில்லை. அதை இந்த படம் காட்டும்" என்று குறிப்பிட்டார். "Unfortunately A True Love Story" என்கிற வாசகத்தோடு வெளிவந்த இந்தப் படம் குறிப்பிடத்தகுந்த வெற்றியை பெற்றது. கன்னடத்திலும் சுதீப் நடித்து, "ஹுச்சா" என்கிற பெயரில் வெளிவந்து மிகப் பெரிய வெற்றியை பெற்றது. சுதீப் வாழ்க்கையில் மறக்கவே முடியாத படம் இது. கிச்சா என்கிற பட்டப்பெயர் இந்தப்படம் மூலமே அவருக்கு கிடைத்தது.

காக்க காக் 

தமிழில் வந்த போலீஸ் படங்களை 'காக்க காக்க' படத்திற்கு முன் 'காக்க காக்க' படத்திற்கு பின் என்று இரண்டாக பிரிக்கலாம் (ஆனால் ஹரி எடுத்த போலீஸ் படங்களை எந்தக் கோணத்திலும் பிரிக்கவே முடியாது என்பது வேறு விஷயம்). அப்படி ஒரு ட்ரெண்ட் செட்டர் படமாக 'காக்க காக்க' விளங்கியது. சூர்யாவின் பாத்திரத்துக்கு முதலில் அஜித், விஜய், விக்ரம் என பலரை கேட்டுப்பார்த்தும் அவர்கள் ஒப்புக்கொள்ளாததால் இறுதியில் சூர்யா நடித்தார். சூர்யா தன் வாழ்வில் எடுத்த மிகமுக்கிய முடிவு இது. அவரது திரை வாழ்க்கையையே இந்தப் படம் புரட்டிப்போட்டது. 

என்கவுண்டர் ஸ்பெஷலிஸ்ட் என்றழைக்கப்படும் பல காவல்துறை அதிகாரிகளின் வாழ்க்கையில் நடந்த உண்மை விஷயங்களை சேர்த்து எழுதப்பட்ட இந்த திரைக்கதையும், அதன் மேக்கிங்கும் ஒரு புது அலையை தமிழ் சினிமாவில் உருவாக்கியது. குறிப்பாக எடிட்டிங்கில் இந்த படம் ஒரு மைல்கல். இந்தப் படம் வெளியான பிறகு வந்த பல படங்களில் இதேபோல் செய்யப்பட்ட எடிட்டிங்கிற்கு "காக்க காக்க கட்" என்கிற பெயரே ஏற்பட்டது என்றால் பார்த்துக்கொள்ளுங்கள். 

பின்னர் தெலுங்கில் வெங்கடேஷை வைத்து கௌதமே மீண்டும் இந்தப் படத்தை இயக்கினார். தமிழை விட தெலுங்கில் இன்னும் சுதந்திரமாக திரைக்கதை மாற்றம் செய்யப்பட்டு எடுத்ததாக அவரே குறிப்பிட்டார். ஆனால் தெலுங்கில் சுமாரான வெற்றியே பெற்றது. சன்னி தியோலை வைத்து இந்தியில் இதே படத்தை எடுக்க கவுதம் ஏற்கனவே யோசித்து வைத்திருந்தாலும் கூட அது கூடிவரவில்லை. பின்னர் 2010-ல் ஜான் ஆப்ரஹாம் நாயகனாக நடிக்க மராத்தி இயக்குனர் நிஷிகாந் காமத் இயக்கி வெளிவந்தது "ஃபோர்ஸ்". படத்தின் திரைக்கதையில் பல மாற்றங்கள் செய்யப்பட்டது. குறிப்பாக முதல் பாதி. துப்பாக்கி பட வில்லன் வித்யுத் ஜமால் வில்லனாக இதில் நடித்தார். படம் மிகப்பெரிய வெற்றியை பெறவில்லை என்றாலும் கூட நல்ல விமர்சனங்கள் வந்தன. 

இந்தியில் இந்தப் படம் எடுப்பதற்கு முன்னரே ஆங்கிலத்தில் இந்தப் படத்தை எடுக்க தயாரிப்பாளர் கலைப்புலி தாணு முயன்றார். பிரபல டென்னிஸ் வீரரும், ஹாலிவுட் தாயரிப்பாளருமான அசோக் அமிர்தராஜோடு கூட்டணி சேர்ந்து எடுக்க தயாரிப்பு நிறுவனம் எல்லாம் ஆரம்பித்த பின்னர் படம் எடுக்கும் முயற்சி கைவிடப்பட்டது. கன்னடத்தில் 'தண்டம் தசகுனம்' என்கிற பெயரில் வெளிவந்தது. ஒரிய மொழியிலும் கூட இந்தப் படத்தின் கதை உபயோகிக்கப்பட்டதாக சொல்வார்கள்.

கு ஷி

அஜித்குமாரை வைத்து எஸ்.ஜே.சூர்யா இயக்கிய 'வாலி' மிகப்பெரிய வரவேற்பை பெற்றது. இதைத்தொடர்ந்து அவர் இயக்கிய படமே 'குஷி'. விஜய் மற்றும் ஜோதிகா நடித்த இந்தப் படத்தின் கதை மிகவும் எளிமையானது. ஆனால் திரைக்கதை அந்நேரத்தில் மிகவும் புதிதாக இருந்ததால் படம் பல இடங்களில் நூறு நாட்களை தாண்டி ஓடியது. இதில் எஸ்.ஜே.சூர்யா படம் டைட்டில் போடும்பொழுதே "இந்த நாயகனும் நாயகியும் ஒண்ணு சேரப்போறாங்க. இதான் கதை. எப்படி ஒன்னு சேருறாங்கன்னு வாங்க பார்க்கலாம்.." என்று கூறித்தான் படமே ஆரம்பிக்கும். உண்மையில் இது ஒரு துணிச்சலான செயல். ஏற்கெனவே பழக்கப்பட்ட கதைகளையே மக்கள் அவ்வளவாக பார்க்க விரும்புவதில்லை. ஆனா இவர் ஒருபடி மேலே போய், இதுதான் கதை என்று சொல்லி படத்தை ஆரம்பித்த விதம் பாராட்டுக்குரியது. 

படம் என்னதான் நன்றாக ஓடினாலும் கூட இறுதிக்காட்சிகள் மிகவும் இழுவையாக இருந்ததால் பல திரையரங்குகளில் இறுதிக்காட்சிக்கு முன்பான சில காட்சிகளை தியேட்டர் உரிமையாளர்களே வெட்டினர். பலர் "கட்டிப்புடி கட்டிப்புடிடா.." பாடல் முடிந்ததுமே பலர் எழுந்து வந்துவிடும் சம்பவங்களும் நடந்தேறின.

படத்தின் மாபெரும் வெற்றியால் தெலுங்கில் இந்தப் படத்தை எடுக்க முடிவு செய்தனர். பவன் கல்யாண் நாயகனாகவும், பூமிகா நாயகியாகவும் நடித்த இந்தப் படமும் மிகப்பெரிய வெற்றியை பெற்றது. வெற்றி என்றால் சாதாரண வெற்றி இல்லை. 2001-ல் இருந்து 2003 வரை தெலுங்கில் மிக அதிகம் வசூல் செய்த படம் என்கிற சாதனையோடு வெற்றி பெற்றது. 'ஒக்கடு' படம் வந்துதான் இந்த சாதனையை முறியடித்தது. பவன் கல்யாண் வாழ்வில் மிக முக்கிய படமாக இதை கூறலாம்.

அடுத்து இந்தியிலும் எஸ்.ஜே.சூர்யாவே மீண்டும் படத்தை இயக்கினார். ஃபர்தீன் கான், கரீனா கபூர் ஜோடியாக நடித்தனர். படம் இந்தியில் வெற்றி பெறாவிட்டாலும் கூட படத்தின் பாடல்கள் அனைத்தும் மிக நன்றாக அமைந்தன. 12 லட்சம் கேசட்டுகள் விற்றுத் தீர்ந்ததாக சொல்கிறார்கள். மூன்றில் சிறந்தது என்றால் அது தெலுங்கு பதிப்புதான். அதன் வெற்றியும் பெரியது. பின்னர் பத்து வருடங்கள் கழித்து கன்னடத்தில் 'எனோ ஒந்தர' என்கிற பெயரில் கணேஷ் - ப்ரியாமணி நடிப்பில் வெளிவந்தது. பத்து வருடங்கள் களைத்து வந்ததால் என்னவோ படம் எடுபடாமல் போனது. இந்தப் படத்தின் பாடல்கள் எல்லா மொழியிலுமே மிகப்பெரிய ஹிட்டாகின. தமிழில் தேவாவும், தெலுங்கில் மணிஷர்மாவும், இந்தியில் அனுமாலிக்கும் இசையமைத்தனர்.

- பால கணேசன், கட்டுரையாளர், தொடர்புக்கு vinolishan@gmail.com

ராசி பலன்கள் / முக்கிய செய்திகளை தினமும் மின்னஞ்சலில் பெற SUBSCRIBE செய்யவும்

எங்களை பின் தொடர

Advertisement:
[X] Close

Breaking News throughout the day

Latest updates will be delivered to you. You can manage from your browser settings.